गडचिरोली : राज्याच्या मुख्य सचिव सुजाता सौनिक यांनी बुधवारी (दि.22) गडचिरोलीत येऊन प्रशासकीय यंत्रणेकडून कामांचा आढावा घेतला. जिल्ह्यातील विकास कामांना गती देत ती कामे पूर्ण वेगाने पुढे नेण्याच्या सूचना त्यांनी दिल्या. जिल्ह्यात दोन आठवड्यांपेक्षा जास्त कालावधीसाठी कोणतीही विकास कामे प्रलंबित राहणार नाहीत याची दक्षता घ्यावी आणि कामांमध्ये अडथळे येत असल्यास आपल्याशी थेट संपर्क साधावा, असे निर्देश त्यांनी अधिकाऱ्यांना दिले.
जिल्हाधिकारी कार्यालयात आयोजित आढावा बैठकीला जिल्हाधिकारी अविश्यांत पंडा, विशेष पोलीस महानिरीक्षक संदीप पाटील, जिल्हा पोलीस अधीक्षक निलोत्पल यांच्यासह सर्व उपविभागीय अधिकारी, उपजिल्हाधिकारी आणि विभाग प्रमुख प्रामुख्याने उपस्थित होते.
सौनिक यांनी तंत्रज्ञानाचा अधिकाधिक वापर करून प्रशासकीय कामकाज जलद गतीने पार पाडण्याची सूचना देऊन गडचिरोलीला डिजिटल जिल्हा म्हणून विकसित करण्यास सांगितले. त्यांनी शासकीय इमारतींवर सौर ऊर्जा पॅनल बसवून ऊर्जा बचत करण्याच्या सूचना दिल्या. कृषी क्षेत्रात सुधारणा करण्यासाठी एक पीक पद्धतीऐवजी द्विपीक किंवा बहुपीक पद्धती अंगीकारण्याचे व फळझाड लागवडीला प्रोत्साहन देण्याच्या सूचना दिल्या.
स्थानिक आयटीआयमधील विद्यार्थ्यांना जिल्ह्यातील उद्योगांमध्ये प्राधान्याने रोजगार उपलब्ध करून देण्याचे व त्यात किमान 30 टक्के महिलांना रोजगाराची हमी दिली जाईल, याची खात्री करण्याचे निर्देश दिले. पेसा कायद्यात येणाऱ्या अडचणी सोडविण्यासाठी कायद्यात सुधारणा करण्याचा प्रस्ताव सादर करण्याच्या सूचनाही त्यांनी दिल्या. स्थानिक स्तरावर ज्या अडचणी सुटू शकत नाही त्याची यादी माझ्याकडे पाठवावी, मी त्या सोडविण्यासाठी 100 टक्के प्राधान्य देईल, असे त्यांनी आश्वस्त केले.
जिल्हाधिकारी अविश्यांत पंडा यांनी सादरीकरणाद्वारे जिल्ह्यातील विकास कामांची माहिती दिली.
मुख्य सचिवांची गोंडवाना विद्यापीठाला भेट
मुख्य सचिव सुजाता सौनिक यांनी गोंडवाना विद्यापीठातील आयआयआयटी प्रशिक्षण केंद्र आणि एकल सेंटरलाही भेट देवून पाहणी केली. डिजिटल कारपेंट्री युनिट व ई-बायसिकल उत्पादन युनिटची उभारणी करून विद्यार्थ्यांना प्रशिक्षणासोबतच रोजगाराच्या संधींना चालना देण्यासाठी पुढाकार घेण्याच्या सूचना त्यांनी यावेळी केल्या.
