गडचिरोली : भामरागड तालुक्यातील मौजा दिरंगी व फुलनार गावांच्या जंगल परिसरात काही सशस्त्र माओवादी घातपात घडविण्याच्या उद्देशाने एकत्रित जमून तळ ठोकून असल्याची माहिती मिळाल्यानंतर गडचिरोली पोलीस आणि सीआरपीएफच्या पथकांनी संयुक्तपणे मोहीम राबविली. त्यात नक्षलाद्यांचा तळ उद्ध्वस्त करण्यात तर पोलिसांना यश आले, पण एका जवानाला प्राणाची आहुती द्यावी लागली. या मोहिमेत नक्षल्याचे काही साहित्य पोलिसांच्या हाती लागले.
दि.10 फेब्रुवारी रोजी विशेष अभियान पथकाच्या 18 तुकड्या आणि सीआरपीएफ क्युएटी पथकाच्या 2 तुकड्या या अभियानावर रवाना झाल्या होत्या. दिरंगी-फुलनार जंगल परिसरात पोहोचून विशेष अभियान पथकातील जवानांकडून शोधमोहिम सुरु करण्यात आली होती. त्याचवेळी पोलीस पथक आल्याचा सुगावा लागल्याने माओवाद्यांनी जवानांच्या दिशेने अंदाधुंद गोळीबार सुरु केला. पोलीस जवानांनीही हिमतीने प्रत्युत्तरादाखल व स्वरंक्षणासाठी माओवाद्यांच्या दिशेने गोळीबार केला. पोलिसांचा वाढता दबाव पाहून माओवाद्यांनी घनदाट जंगलात पळ काढला. मात्र माओवाद्यांच्या भ्याड हल्ल्यामध्ये गडचिरोली विशेष अभियान पथकातील पो.शि.महेश कवडू नागुलवार हे गोळी लागून जखमी झाले होते. त्यांना जंगलातून बाहेर आणून हेलिकॉप्टरच्या मदतीने गडचिरोलीच्या जिल्हा सामान्य रुग्णालयात हलविण्यात आले होते. परंतू त्यांना वीरगती प्राप्त झाली.
काय-काय सापडले घटनास्थळी?
जवानांनी परिसरात शोध अभियान राबविले असता 100 फुट लांबीची कॉर्टेक्स वायर, जिलेटीन कांड्या (15 नग), डेटोनेटर (4 नग), लाल-काळ्या रंगाचे वायर बंडल 1 नग (अंदाजे 70 फुट), सोलार प्लेट (1 नग), वॉकीटॉकी (1 नग), वॉकीटॉकी चार्जर (1 नग), वॉकीटॉकी अॅडॅप्टर (1 नग), टॉर्च (2 नग), युएसबी केबल (1 नग), ताडपत्री (2 नग), जर्मन गंज (2 नग), स्टिल ताट (1 नग), स्टिल मग (2 नग), प्लॅस्टीक कॅन (2 नग), नक्षल डांगरी (1 नग), नक्षल पिट्टू (4 नग), तसेच नक्षल पुस्तके इत्यादी दैनंदिन वापरातील साहित्य जप्त करण्यात आले. पोलिसांनी सदर जंगल परिसरात माओवादविरोधी अभियान तीव्र करण्याचे संकेत दिले आहेत.
