गडचिरोली : अपुऱ्या सिंचन सुविधा असणाऱ्या गडचिरोली जिल्ह्यात शेतकऱ्यांना सुजलाम सुफलाम करण्यासाठी टप्प्याटप्प्याने आठ हजार बोअरवेल निर्माण करण्यासाठी नियोजन करण्याचे निर्देश सहपालकमंत्री अॅड.आशिष जयस्वाल यांनी दिले. जयस्वाल यांनी जिल्हा नियोजन निधीचा आढावा घेताना हे निर्देश दिले. जिल्हा वार्षिक योजनेअंतर्गत मंजूर 604 कोटी रुपयांचा निधी कोणतीही कात्री न लावता उपलब्ध करून देणार असल्याचेही त्यांनी स्पष्ट केले.
जिल्हा नियोजन निधीचा आढावा घेताना सहपालकमंत्र्यांनी सिंचन सुविधांच्या विकासावर विशेष भर दिला. बिरसा मुंडा सिंचन योजनेअंतर्गत बोअरवेल आणि सोलर पंप प्रकल्प प्रभावीपणे राबवण्याच्या सूचना त्यांनी दिल्या. या बैठकीला जिल्हाधिकारी अविश्यात पंडा, खासदार डॅा.नामदेव किरसान, आमदार धर्मरावबाबा आत्राम, आमदार रामदास मेश्राम, आमदार डॉ.मिलिंद नरोटे, पोलीस अधीक्षक निलोत्पल, जिल्हा परिषदेचे मुख्य कार्यकारी अधिकारी सुहास गाडे, उपवनसंरक्षक मिलिश शर्मा हे प्रत्यक्ष तथा दूरदृष्य प्रणालीद्वारे उपस्थित होते.
जिल्हा वार्षिक योजनेअंतर्गत मंजूर निधी यंत्रणांनी तातडीने खर्च करण्याच्या सूचना त्यांनी दिल्या. जिल्ह्याची आत्मनिर्भरता वाढवण्यासाठी उत्पादकता वाढवणाऱ्या योजनांना गती देण्यास सांगतांना कुक्कुटपालन, शेळीपालन आणि दुग्धव्यवसायाला प्रोत्साहन देण्याचे व पाणीस्रोतांचा प्रभावी उपयोग करून पूर्ण क्षमतेने मत्स्य उत्पादन वाढवण्यास प्राधान्य देण्याची सूचना त्यांनी केली. पशुधन वितरणासाठी लॉटरी प्रणालीऐवजी मागेल त्याला लाभ देण्याचे व यासाठी ‘प्रथम मागणी, प्रथम लाभ’ या तत्त्वावर प्रक्रिया करण्यासाठी त्यांनी मंत्रालयीन सचिवांना तात्काळ दूरध्वनीवर संपर्क करून शासनाच्या निकषात बदल करण्याच्या सूचनाही दिल्या.
सार्वजनिक सुविधा आणि नागरी विकासाची कामे प्रलंबित न ठेवता ती वेगाने पूर्ण करण्याचे, तसेच जिल्हा रुग्णालयात अत्याधुनिक सुविधा वाढवण्यासाठी आवश्यक प्रस्ताव तातडीने सादर करण्याचे निर्देशही सहपालकमंत्र्यांनी दिले.
महिला व बालकल्याण विभागाद्वारे माविमच्या माध्यमातून दोन वर्षापूर्वी 150 महिलांना प्रत्येकी 1 लाख रुपये अर्थसहाय्य फिरत्या निधीतून करण्यात आले होते. या योजनेचा चांगला परिणाम दिसून आल्याने आता हे लाभार्थी 200 महिलांपर्यंत वाढले आहेत. या उपक्रमाचे कौतुक करून ही योजना जिल्ह्यासाठी एक आदर्श म्हणून पुढे नेण्याचे निर्देश त्यांनी दिले.
जिल्हाधिकारी अविश्यांत पंडा यांनी जिल्हा वार्षिक योजनेंतर्गत प्राप्त निधी व खर्चाबाबत सादरीकरणाद्वारे माहिती दिली. बैठकीला सर्व यंत्रणाचे संबंधीत अधिकारी उपस्थित होते.
