गडचिरोली : शहरानजिक पुलखल भागात होऊ घातलेल्या प्रस्तावित विमानतळाला (धावपट्टी) पुलखलच्या ग्रामसभेने ठराव घेऊन विरोध केला आहे. शेती हेच गावातील नागरिकांचे उपजिविकेचे एकमेव साधन आहे. विमानतळामुळे गावातील तलाव, बोडी, नाले, गुरे चराईचे झुडपी जंगल आणि शेतीक्षेत्र नष्ट होणार असल्याने कोटगल उपसा जलसिंचनाचे लाभक्षेत्र असलेल्या सुपीक शेतजमिनी विमानतळाकरीता देण्यास ग्रामसभेची शिफारस देणार नाही, असा ठराव ग्रामसभेकडून पारीत करण्यात आला.
अनुसूचित क्षेत्रात समाविष्ट असलेल्या पुलखल ग्रामसभेने बुधवारला ग्रामसभा घेवून सदरचा ठराव पारीत केला. या ठरावानुसार, प्रस्तावित विमानतळ गडचिरोली जिल्ह्याच्या विकासाकरिता मोलाचे योगदान देणारे ठरणार आहे. मात्र सदर विमानतळाकरिता प्रस्तावित ठिकाण हे पुलखल गावातील व आजूबाजूच्या गावातील शेतकऱ्यांच्या कोटगल बॅरेज व कोटगल उपसा सिंचन लाभक्षेत्रातील सुपीक जमिनीचे आहे. याच शेतजमिनींवर गावातील शेतकऱ्यांची उपजीविका अवलंबून आहे.
पुलखल गावाच्या हद्दीतील तलाव, बोडी व झुडपी जंगलाची काही जमीन यात समाविष्ट असल्याने गावातील उर्वरित शेतजमिनीचे व गुरांच्या पिण्याच्या पाण्याचे स्त्रोत नष्ट होणार आहे. गडचिरोली-चंद्रपूर या महामार्गाला जोडणारा पुलखल गावाचा मुख्य रस्ताही कायमचा बंद होणार आहे. गावाचे पारंपारिक देवस्थान एक बोटी माऊली व इतर श्रद्धास्थानेही नष्ट होणार आहेत. तसेच मुरखळा गावाच्या हद्दीतून पुलखल-मुडझा गावाच्या सीमेवर असलेल्या नाल्याला वैनगंगा नदीच्या पुराच्या पाण्याचा दाब (बॅकवॉटर) मोठ्या प्रमाणावर नैसर्गिकरीत्या राहते. विमानतळामुळे सदर नाला (वगर) बुजविल्या जाणार असल्याने पुलखल-मुडझा रस्त्याला व शेतीला पुराचा मोठा फटका बसेल. त्यामुळे विमानतळाकरिता पुलखल गावाच्या हद्दीतील शेतकऱ्यांच्या शेतजमिनी, तलाव, बोडी, झुडपी जंगल, नाला (वगर) व इतर जमीन भूसंपादित करणे हे शेतकरी व इतर नागरिकांवर भविष्यातील उपासमारी आणणारे, जमिनीचा आणि गावाच्या सामूहिक मालमत्तांचा मालकी हक्क हिरावणारे ठरणार असल्याचे म्हटले आहे.
पुलखल गावाच्या संबंधात अनुसूची क्षेत्रातील कायदे व नियमान्वये प्राप्त अधिकारानुसार विमानतळाकरिता पुलखल गावातील शेतकऱ्यांच्या शेतजमिनी गावाची सामूहिक साधन संपत्ती असलेल्या बोडी, तलाव, नाला व झुडपी जंगलाच्या जमिनीचे भूसंपादन करण्यात येऊ नये. त्या संबंधातील ग्रामसभेची शिफारस शासनाकडे करण्यात येऊ नये, तसेच जिल्हा प्रशासनातर्फे ग्रामसभेकडे मागणी करण्यात आलेली भूसंपादनाची शिफारस आमच्या ग्रामसभेने नाकारावी, असा ठराव पारित करण्यात येत असल्याचेही ग्रामसभेने म्हटले आहे.
अनुसूची क्षेत्रातील नागरिकांच्या अधिकारांवर गदा आणण्याऐवजी चामोर्शी रोडवरील सेमाना देवस्थान समोरील व गडचिरोली शहराला लागून असलेल्या जंगलाच्या जागेत सदर विमानतळ प्रस्तावित करण्यात यावे, अशी सूचना पुलखल ग्रामसभेने शासनाकडे केली आहे.
