गडचिरोली : ज्ञानातून विकास यावर विद्यापीठाची महत्त्वाची वाटचाल सुरू असून कला व साहित्याची शिक्षणाला जोड मिळत आहे. या भागातील विद्यार्थ्यांच्या विकासामध्ये गोंडवाना विद्यापीठाची महत्त्वाची भूमिका आहे. विविध अध्यासनांची निर्मिती ही खूपच अभिमानास्पद बाब आहे. यातून विद्यार्थ्यांमध्ये सामाजिक विचारधारा रुजेल. गोंडवाना विद्यापीठाचे विकासाचे मॅाडेल जगाने स्वीकाराने, असे आवाहन नागपुरातील प्रसिद्ध मेंदूविकार तज्ज्ञ पद्मश्री डॅा.चंद्रशेखर मेश्राम यांनी केले. गोंडवाना विद्यापीठाच्या 14 व्या वर्धापन दिनानिमित्त आयोजित सोहळ्यात ते प्रमुख अतिथी म्हणून बोलत होते. डॉ.बाबा आमटे यांचे अध्यासन सुरू व्हावे, अशी अपेक्षाही यावेळी डॅा.मेश्राम यांनी व्यक्त केली.
वास्तविक विद्यापीठाचा स्थापना दिन 2 ऑक्टोबर आहे, मात्र यावर्षी त्याच दिवशी विजयादशमी (दसरा) हा सण असल्यामुळे 6 ऑक्टोबर रोजी हा सोहळा विद्यापीठाच्या नवीन सांस्कृतिक सभागृहात झाला. या कार्यक्रमाच्या अध्यक्षस्थानी कुलगुरु डॉ.प्रशान्त बोकारे, तसेच आमदार तथा अधिसभा सदस्य डॉ.मिलिंद नरोटे, स्व.मारोतराव कांबळे यांचे पुत्र प्राचार्य देवेश कांबळे, ज्ञानदीप शिक्षण प्रसारक मंडळ चंद्रपूरद्वारा संचालित डॉ.खत्री महाविद्यालय, तुकूम चंद्रपूरचे डॉ.नंदकिशोर हरीलाल खत्री हे प्रमुख अतिथी म्हणून उपस्थित होते.
यावेळी गोंडवाना विद्यापीठाचे प्र-कुलगुरु डॉ.श्रीराम कावळे, कुलसचिव डॉ.अनिल हिरेखण, अधिष्ठाता (आंतरविद्या शाखा) प्रा.प्रगती नरखेडकर, वित्त व लेखाधिकारी भास्कर पठारे, व्यवस्थापन परिषदेचे सदस्य प्रशांत मोहिते, डॉ.रंजना लाड, गुरूदास कामडी, डॉ.संजय गोरे, डॉ.लेमराज लडके, डॉ.विवेक गोर्लावार, प्रशांत दोंतुलवार, डॉ.नंदा सातपुते, डॉ.बी.एस.गेडाम आदींची प्रमुख उपस्थिती होती.
शैक्षणिक-सामाजिक योगदानासाठी सत्कार
या कार्यक्रमात शिक्षण आणि सामाजिक क्षेत्रात उल्लेखनीय योगदान दिल्याबद्दल ज्येष्ठ नेते व शिक्षणतज्ज्ञ स्वर्गीय मारोतराव कांबळे यांना मरणोत्तर “जीवन साधना गौरव पुरस्कार” प्रदान करण्यात आला. त्यांचे पुत्र प्राचार्य डॉ.देवेश कांबळे यांनी हा पुरस्कार स्वीकारला. डॉ.खत्री महाविद्यालय तुकूम, चंद्रपूरचे डॉ.नंदकिशोर खत्री यांनाही उपस्थित मान्यवरांच्या हस्ते विद्यापीठाचा “जीवन गौरव साधना पुरस्कार” प्रदान करण्यात आला.
डॉ.देवेश कांबळे यांनी पुरस्काराची रक्कम विद्यापीठातील बॅरिस्टर राजाभाऊ खोब्रागडे अध्यासन केंद्राच्या कार्यासाठी विद्यापीठास दान केली, तर डॉ.नंदकिशोर खत्री यांनी आपली पारितोषिकाची रक्कम कृषी तसेच शिक्षण घेणाऱ्या विद्यार्थ्यांसाठी नाविन्यपूर्ण उपक्रम राबविण्यासाठी दान केली.
आपल्या अध्यक्षीय भाषणात कुलगुरू डॉ.प्रशांत बोकारे म्हणाले, विद्यापीठाच्या अनेक उपक्रमातून विद्यार्थ्याना जीवनमूल्यांचे शिक्षण मिळत आहे. असे शिक्षण घेतलेल्या अनेक विद्यार्थ्यांना विविध संस्थांमध्ये नियुक्ती मिळाल्याचे त्यांनी नमूद केले. हे जीवन शिक्षण विद्यापीठाच्या परिसरात तर आहेच, पण संलग्नित महाविद्यालयाच्या परिसरातही ते व्हावे. या विद्यापीठासाठी यापुढेही आम्ही काहीही कमी पडू देणार नाही, अशी ग्वाही त्यांनी दिली.
आमदार डॅा.मिलिंद नरोटे म्हणाले, विद्यापीठातून विद्यार्थ्यांना ज्ञानदानाचे कार्य उत्तमरित्या सुरू आहे. या विद्यापीठाची उत्तरोत्तर प्रगती व्हावी, तसेच विद्यापीठाच्या मदतीसाठी मी मागेपुढे पाहणार नाही, असा विश्वास त्यांनी दिला. पद्मश्री डॉ.चंद्रशेखर मेश्राम यांच्या परिचयपत्राचे वाचन मराठी विभाग प्रमुख डॉ.सविता सादमवार यांनी केले. प्राचार्य देवेश कांबळे, डॉ.नंदकिशोर हरीलाल खत्री यांच्या मानपात्राचे वाचन प्रा.डॉ.हेमराज निखाडे आणि अमोल चव्हाण यांनी केले. प्रास्ताविक डॉ.श्रीराम कावळे यांनी तर कार्यक्रमाचे सूत्रसंचालन डॉ.शिल्पा आठवले यांनी केले. आभार कुलसचिव डॉ.अनिल हिरेखण यांनी मानले.
विविध पुरस्कारांचे वितरण
उत्कृष्ट अधिसभा सदस्य पुरस्कार गुरुदास कामडी यांना देण्यात आला. उत्कृष्ट महाविद्यालय पुरस्कार आदर्श कला व वाणिज्य महाविद्यालय, देसाईगंज (वडसा) यांना, उत्कृष्ट प्राचार्य पुरस्कार आनंद निकेतन विज्ञान, कला व वाणिज्य महाविद्यालय वरोराचे प्राचार्य डॉ.मृणाल काळे, उत्कृष्ट महाविद्यालयीन शिक्षक पुरस्कार गोविंदराव मुनघाटे कला व विज्ञान महाविद्यालय, कुरखेडाचे प्रा.डॉ.अभय सोळुके, पद्मश्री एस.आर. रंगनाथन उत्कृष्ट ग्रंथपाल पुरस्कार गो.ना.मुनघाटे महाविद्यालय कुरखेडाचे डॉ.अनिल भोयर यांना, उत्कृष्ट विद्यापीठ अधिकारी वर्ग-2 पुरस्कार असिस्टन्ट प्रोग्रामर प्रमोद किसन बोरकर यांना, उत्कृष्ट विद्यापीठ कर्मचारी वर्ग-3 पुरस्कार उच्चश्रेणी लिपीक अविनाश सिडाम यांना, उत्कृष्ट महाविद्यालयीन कर्मचारी वर्ग 3 पुरस्कार पुरस्कार सरदार पटेल महाविद्यालय चंद्रपूरचे विनोद गंगाधर चोपावार यांना, उत्कृष्ट विद्यार्थी पुरस्कार आनंद निकेतन महाविद्यालय, वरोरा येथील रुपेश पांडूरंग कुत्तरमारे यांना देण्यात आला.
