गडचिरोली : स्टिल हब म्हणून विकसित होत असलेल्या गडचिरोली जिल्ह्यात येणाऱ्या काळात झारखंडमधील टाटानगरपेक्षाही मोठी गुंतवणूक होणार आहे. उद्योगांना चालना देत असताना जल, जंगल, जमीनही वाचेल याची काळजी घेतली जाईल. त्यातील रोजगारावर पहिला अधिकार स्थानिक लोकांचा असेल. गडचिरोली जिल्ह्याचे चित्र बदलविण्यासाठी आम्ही सज्ज आहोत, पण त्यासाठी आम्हाला तुमची साथ पाहिजे, असे म्हणत मुख्यमंत्री देवेंद्र फडणवीस यांनी नगर परिषद निवडणुकीत जिल्ह्यातील तीनही नगर परिषदांमध्ये भाजपच्या उमेदवारांना निवडून आणा, असे आवाहन केले. गडचिरोलीत शनिवारी झालेल्या भाजपच्या प्रचार सभेत ते बोलत होते.
या सभेला माजी खासदार तथा भाजप अनुसूचित जनजाती मोर्चाचे राष्ट्रीय महामंत्री अशोक नेते, जिल्हा निवडणूक प्रभारी आमदार बंटी भांगडिया, आमदार डॉ.मिलिंद नरोटे, जिल्हाध्यक्ष प्रा.रमेश बारसागडे, माजी जिल्हाध्यक्ष व जिल्हा निवडणूक प्रमुख प्रशांत वाघरे, ज्येष्ठ सहकार नेते प्रकाश सा.पोरेड्डीवार, माजी आमदार डॉ.देवराव होळी, माजी आमदार कृष्णा गजबे, मा.आ.डॉ.नामदेव उसेंडी, ओबीसी मोर्चाचे प्रदेश उपाध्यक्ष बाबुराव कोहळे, समन्वयक प्रमोद पिपरे, जिल्हा महामंत्री गोविंद सारडा, किशन नागदेवे, प्रकाश गेडाम, सदानंद कुथे, रमेश भुरसे, महिला मोर्चाच्या प्रदेश सचिव रेखा डोळस, महिला मोर्चाच्या जिल्हाध्यक्ष योगिता पिपरे, तसेच भाजपचे नगराध्यक्षपदाचे उमेदवार प्रणोती निंबोरकर (गडचिरोली), रुपेश प्रकाश पुणेकर (आरमोरी) आणि लता सुंदरकर (देसाईगंज) आदी प्रामुख्याने उपस्थित होते.
यावेळी बोलताना मुख्यमंत्री फडणवीस म्हणाले, गडचिरोली जिल्ह्यात सर्वात जास्त वेळा येणारे मुख्यमंत्री म्हणून माझा रेकॅार्ड झाला आहे. कारण माझे या जिल्ह्यावर प्रेम आहे. आतापर्यंत या जिल्ह्याला मागास ठेवण्याचं काम अनेक राज्यकर्त्यांनी केलं. मी विरोधकांवर टिका करत नाही. आम्ही काय केलं आणि काय करणार हे सांगून मते मागतो. पंतप्रधान नरेंद्र मोदींनी शहरांच्या विकासासाठी योजना आणल्या. गडचिरोलीतही पिण्याच्या पाण्यासाठी वाढीव पाणी पुरवठा योजना, भुयारी गटार योजनेसह प्रधानमंत्री आवास योजनेतून पक्के घरे बांधून दिली जाणार आहे. येत्या काळात आऊटर रिंग रोडही करू. एवढेच नाही तर गडचिरोलीला दक्षिण भारताचे प्रवेशद्वार करू. त्यासाठी गडचिरोलीमधील प्रस्तावित विमानतळाचे काम काही महिन्यात सुरू करू, असे आश्वासन मुख्यमंत्र्यांनी दिले.
यावेळी मार्गदर्शन करताना माजी खासदार अशोक नेते म्हणाले, विरोधक केवळ टिका करत असतात. पण आम्ही कामांवर लक्ष केंद्रित करतो. पंतप्रधान मोदींच्या काळात या जिल्ह्यात शेकडो कोटींची कामे झाली. पुढेही होत राहणार. केंद्रात आणि राज्यात ज्याप्रमाणे भाजपचे सरकार आहे, त्याप्रमाणे स्थानिक स्वराज्य संस्थांमध्येही भाजपची सत्ता द्या, म्हणजे कामे वेगाने होतील, असे आवाहन त्यांनी केले. लक्ष्मी ही कमळावर बसते; तुटलेल्या पंजावर, हत्तीवर, उंटावर, बंद पडलेल्या घड्याळावर कधी बसत नाही, असे म्हणत त्यांनी कमळाला मतदान करण्याचे आवाहन केले.
प्रास्ताविकात आमदार डॅा.मिलिंद नरोटे यांनी शहरासाठी आवश्यक प्रस्तावित योजनांची आणि अपेक्षित कामांची माहिती दिली. तसेच नगर परिषदेत भाजपची पुन्हा सत्ता येईल, असा विश्वास व्यक्त केला.
