गडचिरोली : अखिल भारतीय विद्यार्थी परिषदेचे विदर्भ प्रांताचे 54 वे अधिवेशन दिनांक 9, 10 व 11 जानेवारी रोजी भगवान बिरसा मुंडा नगर (सुमानंद सभागृह), आरमोरी रोड गडचिरोली येथे होत आहे. त्याची तयारी पूर्ण झाल्याची माहिती राष्ट्रीय मंत्री पायल किनाके यांनी पत्रपरिषदेत दिली.
या अधिवेशनाचे उद्घाटन राज्याचे आदिवासी विकासमंत्री अशोक उईके यांच्या हस्ते होणार आहे. मुख्य अतिथी म्हणून विशेष पोलिस महानिरीक्षक (नक्षलविरोधी अभियान) संदीप पाटील, तर अभाविपचे राष्ट्रीय महामंत्री डॉ.विरेंद्रसिंह सोलंकी यांची प्रमुख उपस्थिती राहणार आहे. हे उद्घाटन 9 जानेवारी रोजी सकाळी 11:45 वाजता होणार आहे. गडचिरोलीच्या पावन भूमीवर पहिल्यांदाच विदर्भ प्रांताचे अधिवेशन होत असल्याने सर्वांना त्याची उत्सुकता लागली आहे.
विदर्भातून 500 विद्यार्थी येणार
हे प्रांत अधिवेशन तरुणाईला नवी ऊर्जा व दिशा देणारे ठरेल असा विश्वास किनाके यांनी व्यक्त केला. या अधिवेशनात विदर्भाच्या 120 तालुके व 119 शहरांमधून 239 ठिकाणच्या 350 महाविद्यालयांमधील निवडक 500 विद्यार्थी प्रतिनिधी सहभागी होणार आहेत. हे अधिवेशन भगवान बिरसा मुंडा यांच्या 150 व्या जयंती वर्षानिमित्त असल्यामुळे या संपूर्ण अधिवेशन परिसराला जनजाती वीर म्हणजेच ‘भगवान बिरसा मुंडा’ यांचे नाव अधिवेशनस्थळी उभारण्यात आलेल्या नगराला देण्यात आले आहे. या अधिवेशनाच्या मुख्य सभागृहाला वीर बाबुराव शेडमाके असे नाव देण्यात आले आहे.
आज संध्याकाळी प्रदर्शनाचे उद्घाटन
आज (गुरुवारी) सायंकाळी 6:30 वाजता प्रदर्शनीचे उद्घाटन होणार आहे. या प्रदर्शनीला स्व.गीताताई हिंगे यांचे नाव देण्यात आले आहे. जनजाति वीरांची यशोगाथा व अभाविपच्या कार्याचा परिचय देणाऱ्या या प्रदर्शनीचे उद्घाटन सामाजिक कार्यकर्त्या शितल सोमनानी यांच्या हस्ते होणार आहे. यावेळी मुख्य अतिथी म्हणून माजी आमदार डॉ.देवराव होळी, गडचिरोली नगर परिषदेच्या अध्यक्ष प्रणोती निंबोरकर आणि गडचिरोली येथील विश्व हिंदू परिषदेचे अध्यक्ष सुशील हिंगे उपस्थित राहणार आहेत.
विविध विषयांवर होणार चर्चा
या 54 व्या विदर्भ प्रांत अधिवेशनामध्ये सन 2025-2026 साठी पुनर्निर्वाचीत प्रदेश अध्यक्ष डॉ.श्रीकांत पर्बत आणि नवनिर्वाचित प्रदेश मंत्री देवाशिष गोतरकर यांची निवड या अधिवेशनात करण्यात येणार आहे. तसेच शैक्षणिक सद्यस्थिती, सामाजिक सद्यस्थिती व गडचिरोलीच्या विकासाचा नवा दृष्टिकोन या विषयांवर चर्चा करण्यात येणार आहे. जनजाती संस्कृती व परंपरा, अभाविपची कार्यपद्धती व कार्यविस्तार या दोन विषयांवर भाषण सत्रे, शैक्षणिक परिसंवाद, पंचपरिवर्तन आदी विषयाला घेऊन एकूण 10 सत्रे आयोजित करण्यात आली आहेत. या अधिवेशन परिसरात कमीत कमी प्लास्टिकच्या वापर कसा होईल, असे प्रयत्न सर्व व्यवस्थेतील कार्यकर्ता करीत आहे. या संपूर्ण अधिवेशनात अन्नाची नासाडी टाळण्यावरही भर राहणार आहे.
10 ला निघणार शोभायात्रा
अधिवेशन दरम्यान दिनांक 10 जानेवारी रोजी दुपारी 3:30 वाजता गडचिरोली शहरातून भव्य शोभायात्रा काढली जाणार आहे. ही यात्रा भगवान बिरसा मुंडा नगर सुमानंद सभागृह येथून इंदिरा गांधी चौक मार्गे, धानोरा रोड, बाबुराव मडावी चौक, रेड्डी गोडाऊन चौक मार्गे चामोर्शी बस स्टॅाप या मार्गाने जाणार आहे. सायंकाळी 5:30 वाजता अभिनव लॉन येथे जाहीर सभेने शोभायात्रेचा समारोप होणार आहे. या शोभायात्रेत गडचिरोलीतील सर्व महाविद्यालयातील विद्यार्थ्यांनी सहभाग घ्यावा, असे आवाहन अभाविप विदर्भ प्रांत मंत्री पायल किनाके व गडचिरोली नगर मंत्री संकेत म्हस्के यांनी केले.
चार दिवस चालणाऱ्या अधिवेशनासाठी विदर्भातून येणाऱ्या सर्व विद्यार्थी प्रतिनिधींचे उत्साहपूर्वक स्वागत करावे व या अधिवेशनात सहभाग घ्यावा, असे आवाहन यावेळी गडचिरोली नगर अध्यक्ष प्रा.सुनिता साळवे यांनी गडचिरोलीतील नागरिकांना केले. पत्रकार परिषदेला गडचिरोली नगर मंत्री संकेत म्हस्के, जिल्हा मीडिया संयोजक करण चौधरी हेसुद्धा उपस्थित होते.
