गडचिरोली : लॉयड्स व्हिलेज प्रीमियर लीग (LVPL)-2026 ची सांगता लॉयड्स स्पोर्ट्स ग्राउंड, हेडरी येथे उत्साहपूर्ण वातावरणात झाली. ग्रामीण खेळाडूंचा सहभाग, थरारक क्रिकेट सामने आणि स्थानिक नागरिकांच्या उत्स्फूर्त प्रतिसादाने वातावरण भारावून गेले होते. या क्रिकेट सामन्यांमुळे एटापल्ली परिसरातील ग्रामीण क्रीडा प्रतिभेला संधी मिळाली. तसेच क्रीडाभावना आणि एकात्मता वृद्धिंगत करणारा हा स्पर्धा सोहळा ठरला.
अत्यंत रोमांचक अशा अंतिम सामन्यात बीसीसीसी आलदंडी संघाने टोडसा ट्रॉफी फायटर्स संघाचा 3 धावांनी रोमांचक पराभव करून LVPL 2026 ची ट्रॉफी पटकावली.
स्पर्धेच्या यशस्वी आयोजनाबद्दल शुभेच्छा देताना लॉयड्स मेटल्स अँड एनर्जी लिमिटेडचे व्यवस्थापकीय संचालक बी.प्रभाकरन म्हणाले, “या स्पर्धेचे यशस्वी आयोजन केल्याबद्दल मी लॉयड्स स्पोर्ट्स अकादमी आणि संपूर्ण आयोजन समितीचे अभिनंदन करतो. स्थानिक भागातील युवकांना दर्जेदार व्यासपीठ उपलब्ध करून देणे, जेणेकरून ते गडचिरोलीतून राष्ट्रीय आणि आंतरराष्ट्रीय स्तरावर आपली प्रतिभा सादर करू शकतील, हा आमचा प्रयत्न राहिला आहे. अशा स्पर्धांमुळे ग्रामीण स्तरावरील क्रीडा प्रतिभेला प्रोत्साहन मिळेल आणि स्थानिक प्रतिभावंत खेळाडूंची ओळख होण्यास मदत होईल.”
विजेता संघ बीसीसीसी आलदंडी यांना ट्रॉफीसह ₹75,000 चे रोख पारितोषिक प्रदान करण्यात आले, तर उपविजेता टोडसा ट्रॉफी फायटर्स यांना ₹50,000, तर हेडरी हरिकेन्स संघाने तिसरे स्थान मिळवत ₹30,000 जिंकले, याशिवाय नेंदर इलेव्हन हिरोज संघाला चौथ्या स्थानासाठी ₹20,000 प्रदान करण्यात आले. उपांत्यपूर्व फेरीपर्यंत पोहोचलेल्या संघांनाही त्यांच्या उल्लेखनीय कामगिरीबद्दल प्रत्येकी ₹10,000 चे पारितोषिक देण्यात आले.
हेडरी हरिकेन्सचे प्रसन्नजीत सरकार यांना उत्कृष्ट अष्टपैलू कामगिरीसाठी “मॅन ऑफ द सिरीज” घोषित करण्यात आले आणि ₹10,000 चे पारितोषिक देण्यात आले. तसेच उत्कृष्ट फलंदाज, उत्कृष्ट गोलंदाज, उत्कृष्ट क्षेत्ररक्षक, उत्कृष्ट यष्टीरक्षक, उत्कृष्ट अष्टपैलू खेळाडू, उत्कृष्ट युवा खेळाडू आणि सामनावीर असे वैयक्तिक पुरस्कारही प्रत्येकी ₹3,000 रोख पारितोषिकासह प्रदान करण्यात आले.
ही स्पर्धा यशस्वी करण्यासाठी सहकार्य करणाऱ्या गावातील मान्यवर, पोलीस अधिकारी, स्वयंसेवक, सीएसआर टीम सदस्य, लॉयड्सच्या विविध विभागांचे कर्मचारी आणि ग्रामस्थ यांचे आयोजकांनी आभार मानले.
