गडचिरोली : जिल्हा परिषदेच्या शाळांमध्ये परिचर पदभरतीसंदर्भात सोशल मीडियावर बनावट जाहिरात फिरत असल्याचा प्रकार उघडकीस आला. ही जाहीरात पूर्णपणे खोटी, बनावट आणि दिशाभूल करणारी असल्याचा अधिकृत खुलासा जिल्हा परिषदेचे मुख्य कार्यकारी अधिकारी सुहास गाडे यांनी केला आहे. नागरिकांनी अशा अप्रमाणित जाहिरातींवर विश्वास ठेवू नये, तसेच कोणत्याही प्रकारचे आर्थिक व्यवहार अथवा वैयक्तिक माहिती संबंधित व्यक्तींना देऊ नये, असे आवाहन त्यांनी केले आहे.
मागील काही दिवसांपासून विविध सोशल मीडियावर जिल्हा परिषद गडचिरोली अंतर्गत जिल्हा परिषद शाळांमध्ये परिचर पदांच्या भरतीसाठी जाहिरात प्रसारित केली जात आहे. या जाहिरातीत गडचिरोली, अहेरी, आरमोरी, भामरागड, चामोर्शी, एटापल्ली, कोरची, कुरखेडा, मुलचेरा, सिरोंचा, देसाईगंज, धानोरा यांसह विविध तालुक्यांतील शाळांमध्ये प्रतिमहा 22 हजार रुपये वेतनावर भरती केली जाणार असल्याचा दावा करण्यात आला आहे.
जिल्हा परिषद प्रशासनाने स्पष्ट केले आहे की, सदर जाहिरात जिल्हा परिषद, गडचिरोली यांनी प्रसिद्ध केलेली नसून तिचा जिल्हा परिषदेशी कोणताही संबंध नाही. जिल्हा परिषदेमार्फत कोणतीही भरती प्रक्रिया राबविण्यात येत असल्यास त्यासंदर्भातील अधिकृत जाहिरात केवळ जिल्हा परिषदेच्या अधिकृत संकेतस्थळावर आणि मान्यताप्राप्त दैनिक वृत्तपत्रांमधूनच प्रसिद्ध केली जाते. त्यामुळे नागरिकांनी केवळ अधिकृत माध्यमांवरील माहितीवरच विश्वास ठेवावा, असे जि.प. प्रशासनाने स्पष्ट केले.
सोशल मीडियावर प्रसारित होणाऱ्या अप्रमाणित भरती जाहिरातींची सत्यता पडताळून पाहिल्याशिवाय त्यावर विश्वास ठेवू नये. कोणत्याही संशयास्पद जाहिरातीबाबत संबंधित कार्यालयाशी संपर्क साधून खात्री करावी, असेही प्रशासनाने स्पष्ट केले आहे.
