गडचिरोली : उपविभाग पेंढरी अंतर्गत पोलीस स्टेशन जारावंडीच्या हद्दीतील वंडोली जंगल परिसरात 17 जुलै 2024 रोजी झालेल्या पोलीस व नक्षलवाद्यांमधील चकमकीत सात पुरुष आणि पाच महिलांचे (माओवाद्यांचे) मृतदेह आढळून आले होते. या घटनेतील मृत्यूची कारणमिमांसा करण्यासाठी भारतीय नागरीक सुरक्षा संहिता 2023 च्या कलम 196 अन्वये दंडाधिकारी चौकशी केली जात आहे.
या चौकशी प्रक्रियेसाठी प्रत्यक्षदर्शी व्यक्तींनी किंवा या घटनेविषयी माहिती असलेल्या नागरिकांनी आपले लेखी निवेदन शपथपत्रासह उपविभागीय दंडाधिकारी एटापल्ली यांच्यासमोर, सूचना प्रसिद्धी झाल्यापासून 21 दिवसांच्या आत किंवा तत्पूर्वी कार्यालयीन वेळेत सादर करावे, असे आवाहन करण्यात आले आहे. अन्यथा कोणाला काहीही आक्षेप नसल्याचे गृहीत धरून पुढील कार्यवाही करण्यात येईल, असे उपविभागीय दंडाधिकारी नमन गोयल यांनी स्पष्ट केले आहे.
चौकशीमध्ये भाग घेणाऱ्यांनी घटनेचे वर्णन, स्वतःचा अनुभव, घटनेच्या आधी किंवा नंतर घडलेल्या संबंधित घटना, शासकीय किंवा अन्य यंत्रणांच्या प्रतिक्रिया, सहभाग व इतर संबंधित माहिती लेखी स्वरूपात सादर करायची आहे.
