गडचिरोली : वाढत्या थंडीसोबत आता विधानसभा निवडणुकीचे राजकीय वातावरण गरम होऊ लागले आहे. भारतीय राष्ट्रीय काँग्रेसच्या नेत्या प्रियंका गांधी येत्या 13 नोव्हेंबरला गडचिरोलीच्या दौऱ्यावर येणार आहे. यावेळी गडचिरोली शहरात त्यांचा रोड शो होणार आहे. तसेच भाजप नेते तथा केंद्रीय मंत्री नितीन गडकरी यांची 15 नोव्हेंबरला कुरखेडा येथे जाहीर सभा होणार आहे.
अनुसूचित जमातीसाठी राखीव गडचिरोली विधानसभा क्षेत्रात प्रियंका गांधी पहिल्यांदाच येणार आहे. काँग्रेसचे ज्येष्ठ नेते विजय वडेट्टीवार यांच्या निमंत्रणावरून त्या गडचिरोलीत महाविकास आघाडीचे उमेदवार मनोहर पोरेटी यांच्या प्रचारासाठी येणार असून यावेळी त्यांचा रोड शो होणार आहे.
आरमोरी मतदार संघातील महायुतीचे उमेदवार कृष्णा गजबे यांच्या प्रचारार्थ केंद्रीय मंत्री नितीन गडकरी यांची जाहीर प्रचार सभा शुक्रवार, दि.15 नोव्हेंबर रोजी दुपारी 1 वाजता श्रीराम महाविद्यालय, श्रीराम मंदिराच्या प्रांगणात, कुरखेडा येथे होणार आहे.
