गडचिरोली : चामोर्शी तालुक्यातील वालसरा या गावातील भाजप पदाधिकाऱ्याच्या घरातून 45 पेट्या दारू (किंमत 3 लाख 60 हजार रुपये) जप्त करण्यात आल्याने एकच खळबळ उडाली आहे. याप्रकरणी भाजप युवा मोर्चाचे चामोर्शी तालुका उपाध्यक्ष रामचंद्र केशव भांडेकर यांच्यावर दारूबंदी कायद्यानुसार गुन्हा नोंदविण्यात आला. रामचंद्र हे भाजप युवा मोर्चाच्या जिल्हाध्यक्षांचे बंधू आणि माजी महिला जिल्हा परिषद अध्यक्षांचे दिर आहे.
आगामी जिल्हा परिषद आणि पंचायत समिती निवडणुकीच्या तोंडावर आढळलेल्या या दारूसाठ्यामुळे एकच खळबळ उडाली आहे. स्थानिक गुन्हे शाखेच्या पथकाने मंगळवारी पहाटे हा छापा टाकला.
पोलिसांकडून प्राप्त माहितीनुसार, स्थानिक गुन्हे शाखेच्या पथकाला चामोर्शी पोलीस स्टेशनअंतर्गत येणाऱ्या वालसरा गावात रामचंद्र भांडेकर हा घरात अवैधरित्या देशी दारू साठवून विक्रीत करत असल्याची माहिती मिळाली होती. त्यानुसार मंगळवारी पहाटे एलसीबीचे पथक पोहोचले असता भांडेकर याने घरझडती घेण्यास नकार दिला. त्यामुळे पंचांसमक्ष पथकाने झडती घेतली असता घराच्या पहिल्या खोलीत रॅाकेट देशी दारू संत्रा कंपनीचे 45 खरड्याचे बॅाक्स आढळले. त्याची अवैध विक्री किंमत 3 लाख 60 हजार रुपये आहे.
ही दारू येणाऱ्या जि.प.निवडणुकीत मतदारांना आकर्षित करण्यासाठी वापरण्यात येणार होती का? अशी चर्चा परिसरात सुरू आहे.
