गडचिरोली : धानोरा तालुक्यातील पेंढरी प्राथमिक आरोग्य केंद्राअंतर्गत रुपिनगट्टा या गावामध्ये गुरूवारी दुपारी बारश्यानिमित्त आयोजित सामुहिक भोजनावळीच्या कार्यक्रमात 30 लोकांना अन्नातून विषबाधा झाली. त्यापैकी एका बालकाची प्रकृती चिंताजनक आहे. त्याला वाचविण्यासाठी शर्थीचे प्रयत्न सुरू आहेत. उर्वरित सर्व बाधितांची प्रकृती धोक्याबाहेर असल्याचे आरोग्य प्रशासनाकडून कळविण्यात आले. दरम्यान या घटनेत विषबाधा नेमकी कशी झाले हे अजूनही स्पष्ट झालेले नाही.
या कार्यक्रमामध्ये सुमारे 70 लोक उपस्थित होते. भोजनावळीच्या पहिल्या पंगतीमध्ये बसलेल्या सुमारे 30 लोकांना उलटी, मळमळ अशी लक्षणे दिसून आल्यानंतर जेवण थांबविण्यात आले. प्रथम प्राथमिक आरोग्य केंद्र पेंढरी येथे उपचार करुन पुढील उपचाराकरीता रुग्णवाहिकेने सायंकाळी 7.30 वाजताच्या सुमारास 6 रुग्णांना सामान्य रुग्णालय गडचिरोली येथे आणण्यात आले.
भरती रुग्णांमध्ये उलटी, मळमळ, पोटदुखी व डोकेदुखी अशी लक्षणे आढळुन आली. त्यापैकी साहिल सत्तू पदा (5 वर्ष) या बालकाची प्रकृती चिंताजनक असल्याने त्याला व्हेंटीलेटरवर घेऊन उपचार सुरु आहेत. अन्य रुग्णांवर तातडीने उपचार सुरु करण्यात आले. त्यानंतर रात्री 11 वाजताच्या दरम्यान 14 रुग्णांना रुग्णालयामध्ये दाखल करण्यात आले. सर्वावर उपचार सुरु करण्यात आले. त्यात 18 पुरुष व 2 मुलांचा समावेश आहे.
2 मुलांपैकी एका मुलाला महिला व बाल रुग्णालय, गडचिरोली येथे संदर्भित करण्यात आले. सद्य:स्थितीत 1 रुग्ण व्हेंटीलेटरवर असून इतर सर्व रुग्णांची प्रकृती धोक्याबाहेर आहे. 6 रुग्ण हे छत्तीसगड राज्यातील पाखांजूर येथे उपचाराकरीता गेले असल्याची माहिती रुग्णांकडून मिळाली.
अन्न पदार्थाचे नमुने तपासणीकरीता नागपूर येथे पाठविण्यात आले आहे. त्या अहवालानुसार नेमके कोणते विष अन्नात मिश्रित करण्यात आले याबाबत माहिती उपलब्ध होईल. जिल्हा आरोग्य अधिकारी डॉ.प्रताप शिंदे यांनी प्रा.आ.केंद्र पेंढरी येथे भेट देऊन रुग्णांची विचारपूस केली. त्यांना वेळीच संदर्भ सेवा उपलब्ध करुन दिली. प्रा.आ.केंद्र पेंढरी येथे धानोऱ्याचे तालुका आरोग्य अधिकारी डॉ.अविनाश दहिवले, डॉ.सखाराम हिचामी, साथरोग अधिकारी डॉ.रुपेश पेंदाम, जिल्हा हिवताप अधिकारी डॉ.पंकज हेमके हे उपस्थित होते.
रुग्णांच्या व्यवस्थापनाकरीता जिल्हा शल्य चिकित्सक डॉ.प्रमोद खंडाते यांच्या मार्गदर्शनाखाली अति.जिल्हा शल्य चिकित्सक डॉ.सतिशकुमार सोळंके, निवासी वैद्यकीय अधिकारी डॉ.बागराज धूर्वे, भिषक डॉ.आशिष खुणे, श्वसन विकार तज्ज्ञ डॉ.मनिष मेश्राम, वरीष्ठ सल्लागार डॉ.अनुपम महेशगौरी यांनी चमूद्वारे रुग्णसेवा पुरविण्याकरीता शर्थीचे प्रयत्न करून रुग्णांचे प्राण वाचविले असल्याचे जिल्हा शल्य चिकित्सकांनी कळविले.
