गडचिरोली : जिल्ह्यात मतदान संपल्याच्या 24 तासानंतर मतदानाची अंतिम टक्केवारी जाहीर करण्यात आली. तीनही विधानसभा मतदार संघात मिळून सरासरी 75.26 टक्के मतदान झाले आहे. सर्वाधिक 76.97 टक्के मतदान आरमोरी विधानसभा क्षेत्रात झाले आहे. तसेच गडचिरोली विधानसभा क्षेत्रात 74.92, तर अहेरी विधानसभा क्षेत्रात 73.89 टक्के मतदान झाले. संवेदनशिल केंद्रांवरील मतदान केंद्राध्यक्ष आणि ईव्हीएम आज संध्याकाळपर्यंत मुख्यालयी पोहोचल्यानंतर ही आकडेवारी जाहीर करण्यात आली. शनिवारी (दि.23) तीनही विधानसभा क्षेत्राच्या मुख्यालयी सकाळी 8 वाजतापासून मतमोजणीला सुरूवात होणार आहे.
लोकसभा निवडणुकीपेक्षा जास्त मतदान होण्याचे जिल्हा प्रशासनाचे लक्ष्य पूर्ण झाले आहे. इतर जिल्ह्यांमध्ये मतदानासाठी सकाळी 7 वाजतापासून संध्याकाळी 6 वाजेपर्यंत, म्हणजे 11 तास वेळ होता. मात्र गडचिरोली जिल्ह्यात सकाळी 7 ते दुपारी 3 पर्यंत, म्हणजे अवघा 8 तास वेळ असताना आणि दुर्गम, संवेदनशिल मतदान केंद्र असतानाही मतदानाचे प्रमाण चांगले आहे.
जिल्ह्यात कोणत्याही अप्रिय घटनेशिवाय आणि कोणत्याही तांत्रिक अडचणींशिवाय शांततेत व सुरळीत मतदान पार पडले. दुर्गम, नक्षलग्रस्त भागातील अतिसंवेदनशील मतदानकेंद्रांवरही मतदानासाठी नागरिकांच्या मोठ्या रांगा लागल्या होत्या. कुठल्याही मतदान केंद्रावर अनुचित प्रकार घडला नाही. सकाळपासूनच मतदारांनी मोठ्या उत्साहाने लोकशाहीच्या या उत्सवात भाग घेतल्याचे जागोजागी लागलेल्या मतदारांच्या मोठमोठ्या रांगेतून दिसून येत होते. शहरीच नाही तर ग्रामीण भागात मतदारांनी मतदान करण्यासाठी मोठ्या उत्साहाने गर्दी केली होती.
वृद्ध व दिव्यांग मतदारांकरीता व्हीलचेअरची व्यवस्था, तसेच सर्वांकरिता पाणी व आवश्यक त्या सर्व प्रकारच्या सोयीसुविधा मतदान केंद्रांवर करण्यात आल्या होत्या. मदतीसाठी जिल्हा प्रशासनाकडून कर्मचारी नेमण्यात आले होते.
केंद्राचे दरवाजे बंद, आत मतदान सुरू
अनेक ठिकाणी मतदानाची वेळ संपल्यावरही नागरिक मतदानासाठी रांगेत होते. जिल्ह्यात दुपारी 3 वाजेपर्यंतच मतदानाची वेळ होती. त्यामुळे 3 वाजता केंद्राचे मुख्य गेट बंद करण्यात आले. आवारात रांगेत असलेल्या मतदारांना टोकन वाटप करून त्यांचे मतदान पूर्ण करण्यात आले. त्यामुळे काही ठिकाणी जवळपास 5 वाजेपर्यंत मतदान सुरू होते.
