अहेरी : पंचायत समितीची महत्त्वपूर्ण वार्षिक आमसभा येथील वासवी सेलीब्रेशन हॅालमध्ये माजी मंत्री तथा विद्यमान आमदार डॉ.धर्मरावबाबा आत्राम यांच्या अध्यक्षतेखाली झाली. या सभेत विविध विषयांवर सविस्तर चर्चा करण्यात आली. ज्यामध्ये स्थानिक विकास आणि नागरिकांच्या प्रश्नांवर लक्ष केंद्रित करण्यात आले.
या वार्षिक आमसभेला अधिकारी, पदाधिकारी आणि नागरिक उपस्थित होते. यामध्ये तहसीलदार बालाजी सोमवंशी, संवर्ग विकास अधिकारी चव्हाण, मुख्याधिकारी गणेश शहाणे, कृषी उत्पन्न बाजार समितीचे सभापती रविंद्रबाबा आत्राम, सिनेट सदस्य तनुश्री आत्राम, ज्येष्ठ नेते बबलू हकीम, राष्ट्रवादी काँग्रेस पक्षाचे (अजित पवार गट) कार्यकारी जिल्हाध्यक्ष रियाज शेख, विधानसभा अध्यक्ष लक्ष्मण येरावार आणि तालुका अध्यक्ष नागेश मडावी प्रामुख्याने उपस्थित होते.
विविध विषयांवर केली चर्चा
या सभेत उपस्थित मान्यवरांनी विविध विषयांवर आपले मत व्यक्त केले. विशेषतः स्थानिक कृषी, पाणी, शिक्षण, आरोग्य आणि पायाभूत सुविधांशी संबंधित विषयांवर चर्चा करण्यात आली. आमदार डॉ.धर्मरावबाबा आत्राम यांनी उपस्थितांना मार्गदर्शन करताना, सध्याच्या विकासकामांचा आढावा घेतला. आगामी वर्षासाठीच्या योजना व उद्दिष्टांवर प्रकाश टाकला. सर्वसामान्य जनतेला केंद्रस्थानी ठेवून विकास कामे गतीने पूर्ण करण्याचे आवाहन त्यांनी केले. नागरिकांच्या समस्यांचे निवारण करण्यासाठी प्रशासकीय यंत्रणेने अधिक तत्पर असावे, असे निर्देशही त्यांनी दिले.
या आमसभेमुळे स्थानिक नागरिकांना आणि लोकप्रतिनिधींना एकत्र येऊन सामूहिक निर्णय घेण्याची एक चांगली संधी मिळाली. सभेच्या यशस्वी आयोजनाबद्दल आयोजकांनी सर्वांचे आभार मानले.
