गडचिरोली : चिचडोह बॅरेजमधील पाण्याचा लाभ जास्तीत जास्त शेतकऱ्यांना सिंचनासाठी कशा प्रकारे देता येईल यासाठी नियोजन करण्याच्या सूचना संरक्षण राज्यमंत्री संजय सेठ यांनी मंगळवारी अधिकाऱ्यांना दिल्या.
आकांक्षित जिल्ह्याचा आढावा घेण्यासाठी केंद्र शासनातर्फे संरक्षण राज्यमंत्री संजय सेठ गडचिरोली जिल्ह्याच्या दोन दिवसीय दौऱ्यावर आले होते. त्यांनी सोमवारी शासकीय विभाग प्रमुखांकडून आढावा घेतला. त्यानंतर मंगळवारी नवेगाव अंगणवाडी, चिचडोह बॅरेज, मार्कंडा येथील शिवमंदिर, आरोग्य केंद्र व आदिवासी आश्रमशाळेला भेट देवून विविध विकास कामांची पाहणी केली.
यावेळी आमदार डॉ.मिलिंद नरोटे, एकात्मिक आदिवासी विकास प्रकल्पाचे प्रकल्प अधिकारी राहूल मीना, जिल्हा परिषदेचे प्रभारी मुख्य कार्यकारी अधिकारी राजेंद्र भुयार, पाटबंधारे विभागाचे कार्यकारी अभियंता राहूल मोरघडे, जिल्हा आरोग्य अधिकारी डॉ.प्रताप शिंदे, जिल्हा नियोजन अधिकारी श्रीराम पाचखेडे, समाजकल्याण अधिकारी चेतन हिवंज यावेळी प्रामुख्याने उपस्थित होते.
सकाळी नवेगाव येथील एकात्मिक बाल विकास सेवा योजनेंतर्गत बांधण्यात आलेल्या अंगणवाडी केंद्राची ना.सेठ यांनी पाहणी केली. त्यांच्या हस्ते अंगणवाडी केंद्रातील स्तनदा मातांना पोषण विषयक बाळंतविडा किट पुरवठा साहित्याचे वाटप करण्यात आले. यावेळी त्यांनी अंगणवाडी परिसरात वृक्षारोपणही केले. सेठ यांनी आदिवासी विकास विभागाच्या मार्कंडादेव येथील शासकीय आश्रमशाळेत भेट देवून विद्यार्थ्यांशी संवाद साधला. तसेच मार्कंडा येथील आरोग्य केंद्राला भेट देवून पाहणी केली. रूग्णसेवेबाबत उपलब्ध साधनसामग्रीची माहिती जाणून घेतली. त्यांनी मार्कंडा येथील शिवमंदिरात दर्शन घेवून मंदिराची पाहणी केली. यावेळी मंदिर बांधकामाविषयीच्या नागरिकांच्या भावना जाणून घेतल्या.
