पोलीस दलातर्फे स्थापना दिनानिमित्त गडचिरोलीत आकर्षक पथसंचलन

गडचिरोली : महाराष्ट्र पोलीस दलाच्या 2 जानेवारी या स्थापना दिनानिमित्त (रेझिंग डे) 2 ते 8 जानेवारीपर्यंत रेझिंग डे सप्ताह साजरा केला जात आहे. या कालावधीत पोलीस दलाकडून विविध उपक्रम राबविले जातात. या निमित्ताने गुरूवारी (दि.2) सकाळी 10 वाजता गडचिरोली पोलीस दलाने शहरातून आकर्षक पथसंचलन केले. पोलीस अधीक्षक नीलोत्पल हेसुद्धा यात सहभागी झाले होते.

जिल्ह्रातील सर्व पोस्टे/ उपपोस्टे/ पो.मदत केंद्रात 2 ते 8 जानेवारीदरम्यान रेझिंग डे साजरा करण्यात येणार आहे. यानिमित्त पोलीस दलाकडून शाळांमध्ये शस्त्र प्रदर्शन, गडचिरोली पोलीस दलाविषयीची माहिती, सायबर गुन्हे, महिला सुरक्षा याविषयीचे फलक दर्शवून लोकांमध्ये जनजागृती, तसेच स्वच्छता अभियान, रस्ता सुरक्षा रॅली व व्यसनमुक्ती संकल्प रॅलीचे आयोजन करण्यात येणार आहे.

सप्ताहाच्या पहिल्या दिवशी गडचिरोली शहरातील कारगील चौकापासून पथसंचलन सुरु होऊन इंदिरा गांधी चौक ते बस स्थानक, आणि परत इंदिरा गांधी चौक येथे येवून पथसंचलनाची सांगता करण्यात आली. कारगिल चौकात पोलीस अधीक्षक नीलोत्पल यांनी हिरवा झेंडा दाखवून पथसंचलनाला सुरूवात केली. त्यानंतर ते स्वत: यात सहभागी झाले.

सदर पथसंचलनात पोलीस दलातील विविध शाखांनी सहभाग घेऊन महिला सुरक्षा, सायबर जनजागृती, वाहतुकीचे नियम याविषयीचे फलक दर्शवून लोकांमध्ये जनजागृती केली. यात ध्वजवाहक, पोलीस मुख्यालयातील महिला प्लाटून, विशेष अभियान पथकाचे प्लाटुन, बँड पथक, शालेय विद्यार्थी, बुलेट प्लाटून, टु व्हिलर वाहन प्लाटून, श्वान पथक, बीडीडीएस पथक व एमपीव्ही वाहन यांनी शिस्तबद्ध पथसंचलन केले.

यात उपविभागीय पोलीस अधिकारी कार्यालय गडचिरोली, पोलीस स्टेशन गडचिरोली, पोलीस मुख्यालय, मोटार परिवहन विभाग, विशेष अभियान पथक, सिव्हिक अॅक्शन, प्रोपागंडा, श्वान पथक, बीडीडीएस, सीटीसी, सायबर सेल, भरोसा सेल इ. शाखेतील अधिकारी व अंमलदार तसेच शासकीय इंग्रजी माध्यमिक आश्रमशाळा, गडचिरोली, सरस्वती विद्यालय, महिला महाविद्यालय आणि पोलीस भरतीपूर्व प्रशिक्षणार्थी अशा एकुण 250 विद्यार्थी-विद्यार्थींनीनी सहभाग घेतला.

सदर पथसंचलनामध्ये अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम.रमेश, उपविभागीय पोलीस अधिकारी (गडचिरोली) सुरज जगताप, गडचिरोली ठाण्याचे प्रभारी अधिकारी रेवचंद सिंगनजुडे व राखीव पोलीस निरीक्षक अनुजकुमार मडामे, तसेच विविध शाखेचे पोलीस अधिकारी व अंमलदार सहभागी झाले होते.