गडचिरोली : गोंडवाना विद्यापीठात पीएम उषा-मेरू या कार्यक्रमांतर्गत राष्ट्रीय क्रेडिट फ्रेमवर्क – नेप 2020 या विषयावर एक दिवसीय कार्यशाळा आयोजित करण्यात आली होती. हायब्रीड पद्धतीने घेण्यात आलेल्या या कार्यशाळेत राष्ट्रसंत तुकाराम महाराज नागपूर विद्यापीठाचे वाणिज्य शाखेचे अधिष्ठाता डॉ.संजय कविश्वर आणि गोंडवाना विद्यापीठाचे डॉ.मनीष उत्तरवार यांनी मार्गदर्शन केले.
डॉ.कविश्वर म्हणाले, राष्ट्रीय शैक्षणिक धोरण 2020 अंतर्गत आणलेले राष्ट्रीय क्रेडिट फ्रेमवर्क भारताच्या शिक्षण व्यवस्थेत एक नवीन आयाम आणत आहे. हे फ्रेमवर्क शालेय शिक्षणापासून ते उच्च शिक्षण आणि व्यावसायिक प्रशिक्षणापर्यंत सर्व स्तरांवर एकात्मिक क्रेडिट प्रणाली स्थापित करते. आता विद्यार्थ्यांना त्यांच्या आवडीनुसार आणि क्षमतेनुसार विविध विषयांचा अभ्यास करण्याचे अधिक स्वातंत्र्य मिळेल. विद्यार्थी केवळ वर्गांमध्येच नव्हे तर प्रकल्प, इंटर्नशिप आणि सामाजिक सेवा यासारख्या विविध क्रियाकलापांद्वारे क्रेडिट मिळवू शकतात. हे फ्रेमवर्क आजीवन शिक्षणाला प्रोत्साहन देते आणि आंतरराष्ट्रीय स्तरावर स्वीकृत क्रेडिट सिस्टीमशी सुसंगत आहे. शिक्षण अधिक विद्यार्थी केंद्रित आणि लवचिक बनविण्यात मदत करेल. यामुळे विद्यार्थ्यांना त्यांची पूर्ण क्षमता विकसित करण्यात आणि त्यांच्या करिअरची उद्दिष्टे साध्य करण्यास मदत होईल.
कार्यक्रमाच्या अध्यक्षस्थानी विद्यापीठाचे प्र-कुलगुरू डॉ.श्रीराम कावळे होते. डॉ.धनराज पाटील यांनी प्रस्ताविक केले. व्यासपीठावर प्रधानमंत्री उच्च शिक्षण विभागाचे समन्वयक डॉ.प्रितेश जाधव होते. संचालन डॉ.सविता गोविंदवार यांनी केले. आभार प्रदर्शन डॉ.धैर्यशील खामकर यांनी केले.
