गडचिरोली : एटापल्ली तालुक्यातील हेडरीसारख्या दुर्गम गावात पहिल्या बेकरीचे उद्घाटन लॉयड्स मेटल्स अँड एनर्जी लिमिटेड (एलएमईएल)चे व्यवस्थापकीय संचालक आणि लॉयड्स इन्फिनिट फाउंडेशनचे संचालक बी.प्रभाकरन यांच्या हस्ते करण्यात आले.
हेडरी येथे एका छोट्या पण देखण्या समारंभात झालेल्या या ब्लॅक फॉरेस्ट बेकरीच्या उद्घाटनाला प्रामुख्याने पुरसलगोंदीच्या सरपंच अरुणा सडमेक, तोडसाच्या सरपंच वनिता कोरामी, नागुलवाडीचे सरपंच नेवलू गावडे, तोडसाचे उपसरपंच प्रशांत आत्राम, नागुलवाडीचे उपसरपंच राजू तिम्मा, पुरसलगोंदीचे माजी सरपंच कात्या तेलामी, पुरसलगोंदीच्या माजी सरपंच कल्पना आलाम, ग्रामपंचायत सदस्य छाया जेट्टी आणि परिसरातील लोक मोठ्या उत्साहाने उपस्थित होते.
विकास हा केकसारखा असतो. तो तयार व्हायला वेळ लागतो, पण तयार झाल्यावर तो गोड लागतो. गेल्या काही वर्षांपासून गडचिरोली जिल्ह्यातील दुर्गम भागातील लोकांना हा अनुभव येत आहे. या बेकरीच्या निमित्ताने या भागातील विकासाच्या यशोगाथेत एक नवीन अध्याय जोडला गेला.
गावातील सरपंचांनी या बेकरीच्या उभारणीबद्दल आनंद व्यक्त केला. बी.प्रभाकरन म्हणाले, बेकरी ही केवळ एक इमारत नसून गडचिरोली जिल्ह्यातील दुर्गम भागातील लोकांपर्यंत पोहोचणाऱ्या विकासाचे प्रतिबिंब आहे. गडचिरोली जिल्हा केवळ महाराष्ट्रातच नव्हे तर संपूर्ण देशातील सर्वोत्तम परिवर्तनकथांपैकी एक म्हणून खूप वेगाने उदयास येत आहे. गडचिरोलीतील लोकांनी आत्मविश्वासपूर्वक लिहिलेल्या या कथेत नवीन प्रशंसनीय अध्याय जोडले जात आहेत. ब्लॅक फॉरेस्ट बेकरीसारख्या उपक्रमांनी त्यांची जीवनशैली समृद्ध करण्याचा लॉयड्स मेटल्सला आनंद आहे, असे ते म्हणाले.
कोनसरीतही बेकरीला सुरूवात
यापूर्वी 27 जून रोजी, कोनसरी गावात देखील ब्लॅक फॉरेस्ट बेकरीचे उद्घाटन करण्यात आले होते. कोनसरीमधील हा पहिला बेकरी आणि फूड प्लाझा आहे. कोनसरी येथे एलएमईएलचे डीआरआय आणि पेलेट प्रकल्प कार्यरत आहेत आणि 4.5 एमटीपीए क्षमतेचा विशाल एकात्मिक पोलाद प्रकल्प प्रस्तावित आहे.
पूजा आणि उद्घाटनानंतर प्रभाकरन यांनी हेडरीस्थित बेकरीला भेट दिली आणि एलएमईएल अधिकाऱ्यांशी तसेच स्थानिक ग्रामस्थांशी संवाद साधला.
