गडचिरोली : एटापल्ली तालुक्यातील हेडरीसारख्या ठिकाणी लॅायड्स मेटल्सने उभारलेल्या काली अम्मल स्मृती रुग्णालयातील अत्याधुनिक सुविधा आणि सेवेचे अनेक अनुभव आता नागरिकांना येऊ लागले आहेत. यातच एका गर्भवती महिलेवर आपत्कालीन सिझेरियन शस्रक्रिया करताना एपिड्युरल अॅनेस्थेशियाच्या मदतीने आरामदायी आणि वेदनारहित प्रसुतीचा अनुभव मिळाला. यातून 2.277 किलोग्रॅम वजनाच्या निरोगी बाळाचा जन्म झाला.
सुरुवातीला प्रसुतीवेदना कमी करण्यासाठी आणि नैसर्गिक प्रसुतीच्या प्रयत्नाला मदत व्हावी यासाठी महिलेला एपिड्युरल अ‍ॅनाल्जेसिया देण्यात आले होते. मात्र, गर्भावस्थेदरम्यान गर्भजलाचे प्रमाण कमी होणे, गर्भाच्या वाढीवर मर्यादा येणे, तसेच बाळाच्या मानेभोवती नाळेचा एक फेरा असणे अशा गुंतागुंती आढळून आल्या. त्यानंतर गर्भामध्ये तणावाची लक्षणे दिसू लागल्याने वैद्यकीय पथकाने तातडीने लोअर सेगमेंट सिझेरियन सेक्शन करण्याचा निर्णय घेतला.
वैद्यकीय पथकातील उत्तम समन्वय आणि अ‍ॅनेस्थेशियातील तज्ज्ञतेमुळे यापूर्वी दिलेल्या एपिड्युरल अ‍ॅनेस्थेशियाचाच प्रभावीपणे विस्तार करून शस्त्रक्रियेसाठी आवश्यक भूल देण्यात आली. त्यामुळे जनरल अ‍ॅनेस्थेशिया देण्याची गरज भासली नाही. परिणामी, शस्त्रक्रियेदरम्यान मातेला आरामदायी आणि वेदनारहित अनुभव मिळाला.
उच्च जोखमीच्या गर्भावस्थांचे व्यवस्थापन करताना योग्य एपिड्युरल तंत्र, वेळेवर घेतलेले वैद्यकीय निर्णय आणि समन्वयपूर्ण सांघिक कार्य किती महत्त्वाचे असते, हे या प्रकरणातून अधोरेखित झाले आहे. यामध्ये मातेला होणारा त्रास कमी करण्यासोबतच तिची सुरक्षितता आणि आराम यांना प्राधान्य देण्यात आले.
या घटनेतून मातृत्व सेवेतील संवेदनशीलता, वैद्यकीय कौशल्य आणि आधुनिक आरोग्य सुविधांचा उत्कृष्ट प्रत्यय दिला. गडचिरोलीच्या दुर्गम भागात असलेले हे रुग्णालय आदिवासी समाजासह आरोग्य सुविधांपासून वंचित असलेल्या नागरिकांपर्यंत दर्जेदार आरोग्यसेवा पोहोचविण्यासाठी सातत्याने प्रयत्नशील आहे.
लॉयड्स मेटल्स अँड एनर्जी लिमिटेडचे व्यवस्थापकीय संचालक बी.प्रभाकरन यांनी या यशस्वी उपचारासाठी डॉक्टरांच्या पथकाचे आणि इतर सहायक कर्मचाऱ्यांचे अभिनंदन केले. त्यांनी माता आणि नवजात बालकाच्या उत्तम आरोग्यासाठी शुभेच्छा दिल्या. लॉयड्सने विकसित केलेल्या वैद्यकीय सुविधा दुर्गम भागातील नागरिकांसाठी वरदान ठरत असल्याबद्दल त्यांनी मनस्वी समाधान व्यक्त केले.
