देसाईगंज : येथे गडचिरोली पोलीस दलासह राज्य राखीव पोलीस दल आणि रोटरी क्लब नागपूर, तालुका आरोग्य विभाग देसाईगंज यांच्या संयुक्त विद्यमाने रविवारी (दि.24) आरोग्य तपासणी शिबिराचे आयोजन केले होते. यात 547 नागरिकांची तपासणी करण्यात आली. त्यातून विविध आजारांच्या रुग्णांची पुढील उपचारासाठी निवड करण्यात आली.
पावसाळ्यामध्ये बदलत असलेल्या हवामानामुळे, तसेच दूषित अन्न-पाण्यामुळे पसरणाऱ्या आजारांचे प्रमाण अधिक असते. त्याबाबत जनजागृती करुन नागरिकांना विविध आरोग्य तपासणी आणि औषधोपचार मिळवून देण्याच्या उद्देशाने पोलीस अधीक्षक नीलोत्पल यांच्या संकल्पनेतून सदर आरोग्य शिबिराचे आयोजन करण्यात आले होते. या शिबिरामध्ये रोटरी क्लब नागपूरच्या प्रमुख डॉ.रश्मी शाहू, डॉ.गिरीश छाबराणी यांच्या नेतृत्वात प्रख्यात हृदयरोग तज्ज्ञ, स्त्रीरोग तज्ज्ञ, बालरोग तज्ज्ञ, कान नाक घसा तज्ज्ञ, दंत चिकित्सक, नेत्ररोग तज्ज्ञ व इतर आजारांवरील तज्ज्ञ वैद्यकीय अधिकारी तसेच सावंगी प्राथमिक आरोग्य केंद्राचे वैद्यकीय अधिकारी डॅा.गहाणे, डॅा.सहारे यांच्या उपस्थितीत नागरिकांची आरोग्य तपासणी करण्यात आली.
शिबिराचे उद्घाटन आ.रामदास मसराम यांच्या हस्ते करण्यात आले. यावेळी आजारांची तपासणी करून आवश्यकतेनुसार नागरिकांना औषधी उपलब्ध करुन देण्यात आली. तसेच एकूण 41 नागरिकांना विविध रुग्णालयांच्या ठिकाणी शस्त्रक्रियेसाठी शिफारस करण्यात आली. 31 नागरिकांचे वंध्यत्व निवारणासाठी तज्ज्ञ वैद्यकीय अधिकाऱ्यांकडे शिफारस करण्यात आली आहे. यासोबतच एकूण 125 नागरिकांची नेत्र तपासणी करुन त्यांना चष्म्यांचे वाटप करण्यात आले.
हे शिबिर एसआरपीएफ गट क्र.13 च्या समादेशक भाग्यश्री नवटाके, अपर पोलीस अधीक्षक (अभियान) एम.रमेश, अपर पोलीस अधीक्षक (प्रशासन) गोकुल राज जी, तसेच उपविभागीय पोलीस अधिकारी कुरखेडा रवींद्र भोसले, सहाय्यक समादेशक ललित मिश्रा आणि लांबेवार यांच्या मार्गदर्शनाखाली देसाईगंजचे प्रभारी अधिकारी पोनि.अजय जगताप यांच्या नेतृत्वात सपोनि मनिष गोडबोले, पोउपनि. देरकर व अंमलदार तसेच रा.रा.पो.बल गट क्र 13, विसोरा येथील पोनि.पवार, मोरला यांनी यशस्वीरित्या पार पाडले.
