गडचिरोली : बाल न्याय अधिनियमाची पूर्तता न करता दत्तक विधान केल्यास संबंधित व्यक्ती 3 वर्षापर्यंत कैद किंवा 1 लाख रुपयापर्यत दंड किंवा दोन्ही शिक्षेस पात्र ठरू शकतो. तसेच कोणत्याही उद्देशाने बालकांची विक्री किंवा खरेदी केल्यास अशा व्यक्तींना 5 वर्षापर्यंत सश्रम कारावास आणि 1 लाख रुपयांपर्यत दंडाच्या शिक्षेची तरतूद आहे. त्यामुळे दत्तक मूल घेऊ इच्छिणाऱ्या पालकांनी कायदेशीररित्या दत्तक विधानाची प्रक्रिया पूर्ण करावी, असे आवाहन जिल्हाधिकारी संजय दैने यांनी केले आहे.
जिल्हयामध्ये लडू दत्तक विशेष संस्था, बजरंग नगर गडचिरोली ही एक मान्यताप्राप्त विशेष दत्तक संस्था कार्यरत आहे. कायदेशिररित्या दत्तक घेण्याकरीता विशेष दत्तक संस्था, जिल्हा बाल संरक्षण कक्ष आणि बालकल्याण समितीमार्फत देशातील व विदेशातील भावी पालकांना बालके दत्तक देण्याचे कार्य चालू आहे. यासाठी दत्तक इच्छुक पालकांनी संकेतस्थळावर ऑनलाईन नोंदणी करणे आवश्यक आहे.
दत्तक इच्छुक पालकांनी कायदेशीर दत्तक प्रक्रिया पुर्ण करण्याकरिता बालगृहे, विशेष दत्तक संस्था, जिल्हा महिला व बालविकास अधिकारी कार्यालय, जिल्हा बाल संरक्षण कक्ष, जिल्हा बाल संरक्षण अधिकारी अविनाश गुरनुले यांच्यांशी संपर्क साधावा.
इच्छुक पालकांनी बॅरेक क्रमांक 1, खोली क्रमांक 26 व 27, जिल्हाधिकारी कॉम्प्लेक्स, गडचिरोली येथे प्रत्यक्ष किंवा 07132-222647 या क्रमांकावर फोन करून माहिती घ्यावी, असे आवाहन जिल्हा महिला व बालविकास अधिकारी प्रकाश भांदककर यांनी केले आहे.
