गडचिरोली : जिल्ह्यातील आरमोरी व चामोर्शी तालुके वगळता इतर 10 तालुक्यात आज दि.4 डिसेंबर रोजी जंतनाशक गोळ्या दिल्या जाणार आहेत. राष्ट्रीय जंतनाशक दिनानिमित्त 1 ते 19 वर्ष वयोगटातील एकूण 1 लाख 90 हजार 994 लाभार्थ्यांना आरोग्य विभागाच्या वतीने ही जंतनाशक गोळी दिली जाणार आहे.
आरोग्य विभागाने याबाबत नियोजन केले आहे. शिक्षण विभाग व बाल कल्याण विभाग यांच्या समन्वयाने जिल्ह्यातील 1,90,994 मुला-मुलींना अंगणवाड्या, शाळा, कॅालेजमध्ये जंतनाशक गोळीचे वाटप केले जाणार आहे.
जंतामुळे बालकांमध्ये व किशोरवयीन मुला-मुलींमध्ये ॲनिमिया, पोटदुखी, उलट्या, अतिसार, मळमळ, भूक मंदावणे आदी आजारांचा धोका उद्भवतो. त्यामुळे हा संभाव्य धोका टाळण्यासाठी 1 ते 19 वर्षे वयोगटातील सर्व मुला-मुलींनी ही जंतनाशक गोळी घ्यावी, असे आवाहन जि.प.च्या मुख्य कार्यकारी अधिकारी आयुषी सिंह यांनी केले आहे.
जिल्हा परिषद आरोग्य विभागाने यासाठी वैद्यकीय अधिकारी, शिक्षक व इतर संबंधित कर्मचाऱ्यांना आवश्यक त्या सूचना दिल्या आहेत. जिल्ह्यातील 1713 अंगणवाडी केंद्रे, 1190 जिल्हा परिषद शाळा, 84 आश्रमशाळा, 92 खाजगी शाळा, 14 महाविद्यालये, 151 सरकारी महाविद्यालये अशा एकूण 3244 संस्थांमधून मुला-मुलींना जंतनाशक गोळी देण्यात येणार आहे. काही कारणास्तव 4 डिसेंबरला ज्या बालकांना जंतनाशक गोळी दिली गेली नसेल अशा वंचित सर्व बालकांना 10 डिसेंबरला मॉप-अप दिनी ही गोळी देण्यात येणार असल्याचे जिल्हा आरोग्य अधिकारी डॉ.प्रताप शिंदे यांनी सांगितले.
जंतामुळे मुलांमध्ये ॲनिमिया, पोटदुखी, उलट्या, अतिसार, मळमळ, भूक मंदावणे यासह कुपोषण, वाढ खुंटणे आदी आजारांचा धोका असतो. त्यामुळे 1 ते 19 वयोगटातील मुलांना वर्षातून दोन वेळा जंतनाशक गोळी देणे आवश्यक आहे. आरोग्य विभागाकडून सप्टेंबर आणि फेब्रुवारी या दोन महिन्यांत जंतनाशक मोहीम राबविली जाते. या मोहिमेदरम्यान 1 ते 19 वयोगटातील मुलांना अर्धी ते एक गोळी खायला किंवा पाण्यात विरघळून दिली जाते, अशी माहिती जिल्हा माता व बाल संगोपन अधिकारी डॉ. प्रफुल्ल हुलके यांनी दिली.
बालकांच्या आरोग्याविषयी काही शंका असल्यास आरोग्य सल्ला व मार्गदर्शन केंद्राच्या टोल फ्री क्रमांक 104 वर नागरिक संपर्क करू शकतात किंवा गरज भासल्यास तातडीच्या वैद्यकीय सेवेअंतर्गत कार्यरत रुग्णवाहिका सेवेच्या टोल फ्री क्रमांक 108 वर संपर्क करुन रुग्णवाहिका मागवू शकतात.
अल्बेंडाझोल ही गोळी शासकीय आरोग्य केंद्रांमध्ये मोफत दिली जाते. आरोग्य उपकेंद्र, प्राथमिक आरोग्य केंद्र, ग्रामीण रुग्णालय, उपजिल्हा रुग्णालय, जिल्हा रुग्णालय यासोबतच अंगणवाडी, शाळा, महाविद्यालयांतही या गोळ्या मोफत उपलब्ध करून दिल्या जाणार आहेत.
