गडचिरोली : गडचिरोली शहरातील महाराजा सेलिब्रेशन हॉल येथे स्पंदन फाउंडेशनच्या वतीने शिक्षक दिन समारंभ उत्साहपूर्ण वातावरणात साजरा करण्यात आला. या कार्यक्रमाला माजी खासदार तथा भाजप अनुसूचित जनजाती मोर्चाचे राष्ट्रीय महामंत्री डॉ.अशोक नेते, आ.डॅा.मिलिंद नरोटे यांची विशेष उपस्थिती होती.
याप्रसंगी आ.डॉ.मिलिंद नरोटे यांनी मा.खा.डॉ.अशोक नेते यांचा शाल, श्रीफळ व रोपटे देऊन सन्मान केला. तसेच जिल्हा परिषद शाळांमधील उल्लेखनीय कार्य करणाऱ्या शिक्षकांचा शाल-श्रीफळ व सन्मानचिन्ह देऊन सत्कार करण्यात आला.
शिक्षक दिन हा केवळ औपचारिक सोहळा नसून, समाजाच्या जडणघडणीत शिक्षकांच्या असलेल्या योगदानाचे स्मरण करण्याचा दिवस आहे. दिवंगत राष्ट्रपती, तत्त्वज्ञ व भारतरत्न स्पंदन फाउंडेशनने या निमित्ताने शिक्षकांचा गौरव केला ही बाब प्रशंसनीय आहे, सर्व शिक्षकांना मी मनःपूर्वक शुभेच्छा देतो, असे मनोगत यावेळी मा.खा.डॉ.नेते यांनी व्यक्त केले.
स्पंदन फाउंडेशन – सेवाभावातून समाजोन्नती
स्पंदन फाउंडेशन ही गडचिरोली जिल्ह्यात सामाजिक, शैक्षणिक व राजकीयदृष्ट्या कार्यरत एक सेवाभावी संस्था म्हणून ओळखली जाते. प्रत्येक समाजघटकापर्यंत सेवा व सकारात्मक कार्य पोहोचवण्याचे ध्येय घेऊन ही संस्था कार्यरत आहे. शैक्षणिक प्रोत्साहन, सामाजिक बांधिलकी व विकासात्मक कामांमध्ये स्पंदन फाउंडेशन अग्रेसर असल्याचे या कार्यक्रमातून पुन्हा अधोरेखित झाले, असे डॅा.अशोक नेते म्हणाले.
या कार्यक्रमाला प्रामुख्याने भाजपचे जिल्हाध्यक्ष रमेश बारसागडे, माजी जिल्हाध्यक्ष प्रशांत वाघरे, जिल्हा महामंत्री गिता हिंगे, प्राचार्य मानसी गगधानी (जळगाव), आमदार डॉ.नरोटे यांच्या पत्नी वैशाली नरोटे, ओबीसी नेते शेषराव येलेकर, कुणबी समाजाचे नेते भाऊसाहेब ताजने यांची उपस्थिती होती.
मोठ्या संख्येने उपस्थित राहिलेल्या शिक्षक, नागरिक व कार्यकर्त्यांच्या उपस्थितीत शिक्षक दिनाचा हा सोहळा अतिशय प्रेरणादायी आणि संस्मरणीय ठरला.
