गडचिरोली : दिवसेंदिवस सायबर अपराधांचे तसेच इंटरनेट व समाज माध्यमांद्वारे फसवणुकीचे प्रमाण मोठया प्रमाणावर वाढत आहे. जिल्ह्यातील सर्वसामान्य नागरिकांना विविध उपक्रमांच्या माध्यमातून वेगवेगळया विषयांसंबंधी जनजागृतीचा एक भाग म्हणून बुधवार, दि.12 मार्च रोजी गडचिरोली पोलीस दलाच्या वतीने ‘सायबर दुत’ या मोबाईल व्हॅनचे अनावरण करण्यात आले. पोलीस अधीक्षक कार्यालयात अपर पोलीस महासंचालक (विशेष कृती) डॉ.छेरिंग दोरजे यांच्या हस्ते हे अनावरण करण्यात आले.
गडचिरोली जिल्हयातील दुर्गम भागांमध्ये अजूनही मोबाईल व इंटरनेटच्या वापराबाबत परिपूर्ण प्रमाणात जागृती नाही. आजच्या काळात इंटरनेटच्या वाढत्या वापरामुळे सायबर अपराध ही समस्या उग्र रूप धारण करत आहे. डिजिटल अरेस्ट, ऑनलाईन गेमिंग फसवणूक, शासकिय योजनांच्या नावाने फसवणूक, व्हॉट्स अॅप व्हिडीओ कॉलद्वारे पैसे उकळणे यांचे प्रमाण अधिक आहे. याला आळा बसावा, लोकांची फसवणूक होऊ नये म्हणून व गडचिरोली जिल्ह्यातील नागरिक हे सायबर साक्षर व्हावेत या उद्देशाने गडचिरोली पोलीस दलातर्फे या सायबर दुत मोबाईल व्हॅनची संकल्पना सुरु करण्यात आली आहे.
हे सायबर दुत वाहन जिल्ह्यातील वर्दळीच्या ठिकाणी, जसे शाळा, महाविद्यालये, बाजार, चौक तसेच बस स्थानक यांसारख्या ठिकाणी जाऊन व्हिडीओ-ऑडीओद्वारे तसेच पोस्टर व बॅनरद्वारे लोकांना सायबर साक्षर करण्यात हातभार लावणार आहे. तसेच सायबर गुन्हयांविषयी माहिती देणार आहे. या फिरत्या वाहनाच्या माध्यमातून गडचिरोलीतील नागरिकांना सायबर साक्षर होण्याविषयी शपथ देखील देण्यात येणार आहे.
सदर मोबाईल व्हॅनच्या उद्घाटन कार्यक्रमाप्रसंगी पोलीस उपमहानिरिक्षक (गडचिरोली परिक्षेत्र) अंकित गोयल, पोलीस अधीक्षक नीलोत्पल, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम.रमेश, अपर पोलीस अधीक्षक (अहेरी) एम.व्ही. सत्यसाई कार्तिक हे उपस्थित होते. या उपक्रमासाठी सायबर पोलीस स्टेशनचे निरीक्षक अरुण फेगडे, उपमहानिरीक्षक नेहा हांडे व अंमलदारांनी विशेष परिश्रम घेतले. मोबाईल व इंटरनेटच्या वापराविषयी जागरुक राहून आपल्यासोबत कोणत्याही प्रकारची ऑनलाईन फसवणूक झाल्यास किंवा गुन्हा घडल्यास सायबर पोलीस स्टेशन गडचिरोली येथे तात्काळ तक्रार नोंदवावी, असे आवाहन यावेळी पोलीस अधीक्षक नीलोत्पल यांनी केले.
