गडचिरोली : जिल्हा माळी समाज संघटनेच्या वतीने फुले दाम्पत्य प्रतिष्ठान देवापूर परिसर, आदर्शनगर गडचिरोली येथे क्रांतीसूर्य महात्मा जोतीराव फुले यांचा स्मृतीदिन २८ नोव्हेंबर रोजी शिक्षक दिन म्हणून साजरा करण्यात आला. शिक्षकांनी नियोजित अभ्यासक्रमाच्या मर्यादेत न राहता सामाजिक भान जपत बदलत्या संदर्भानुसार शिक्षकांच्या भूमिकेत अध्यापन करावे, असे मनोगत उद्घाटनपर भाषणात प्रा.संजय लेनगुरे यांनी व्यक्त केले.
यावेळी महात्मा फुले यांच्या विविधांगी कार्याचा आढावा घेताना, ‘लोकभावनेचा आदर करून महात्म्यांच्या स्मृतिदिनी शासकीय स्तरावर शिक्षक दिन साजरा करण्यासाठी लोकोत्सवाद्वारे दबाव निर्माण करावा,’ असे प्रमुख मार्गदर्शक प्रा.डॉ.नरेंद्र आरेकर यांनी सुचविले.
सावित्रीमाईंच्या विचार व कार्याच्या अनुषंगाने त्यांचे समाजाप्रती, विशेषतः महिलांप्रती करुणा व त्याग विशद करताना, ‘सावित्रीमाईंना अपेक्षित बदल महिलांनी स्वत:मध्ये करावा. परिवर्तन शक्य असुन ते सर्वस्वी महिलांच्या हातात आहे. त्यासाठी महिलांनी तयार व्हावे’, असे आवाहन प्रमुख मार्गदर्शक म्हणून बोलताना सामाजिक कार्यकर्त्या कविता गेडाम-मडावी यांनी केले.
याच कार्यक्रमात सृष्टी फाउंडेशन गडचिरोली यांच्या वतीने आगळ्यावेगळ्या सामाजिक कार्याबद्दल केशव गुरनुले यांना समाजशिक्षक पुरस्काराने गौरविण्यात आले. विजय गुरनूले रा.सिंदेवाही यांनी गायलेल्या महात्मा फुले यांच्यावरील स्फूर्तीदायी गिताने वातावरण भारावून टाकले. कार्यक्रमाचे प्रास्ताविक संघटनेचे सचिव राजेंद्र आदे, सूत्रसंचालन पुरुषोत्तम लेनगुरे व कोषाध्यक्ष नरेंद्र निकोडे यांनी आभार व्यक्त केले.
याप्रसंगी संपूर्ण जिल्हाभरातील व शेजारच्या चंद्रपूर, गोंदिया, भंडारा इ.जिल्ह्यातील विविध जातीधर्माचे समाजबांधव मोठ्या संख्येने उपस्थित होते. कार्यक्रमाच्या यशस्वीतेसाठी संघटनेचे प्रत्येक तालुक्यातील पदाधिकारी व कार्यकर्ते यांनी मेहनत घेतली
