गडचिरोली : गोंडवाना विद्यापीठाचा घटक असलेल्या आदर्श पदवी महाविद्यालयाअंतर्गत सी.आय.आय.आय.टी. केंद्राच्या माध्यमातून विद्यार्थ्यांना माहिती तंत्रज्ञान आणि ऑटोमोबाईल क्षेत्रासंबंधी विविध कौशल्यपूर्ण प्रशिक्षण दिले जाते. या प्रशिक्षण केंद्राला मुंबई विद्यापीठाचे कुलगुरु डॉ. रवींद्र कुलकर्णी यांनी भेट देऊन केंद्राविषयी माहिती घेतली. यावेळी त्यांनी उपस्थित विद्यार्थ्यांसोबत संवादही साधला.
यावेळी डॅा.कुलकर्णी यांनी प्रशिक्षण केंद्र आणि आदर्श पदवी महाविद्यालयामध्ये सुरू असलेल्या विविध कौशल्यपूर्ण अभ्यासक्रम आणि त्याच्या माध्यमातून जिल्ह्यातील विद्यार्थ्याना होणाऱ्या फायद्यासंदर्भात माहिती जाणून घेतली. विद्यार्थ्यांना कौशल्यपूर्ण शिक्षण देऊन रोजगाराभिमुख बनवण्याचे कार्य करत असल्याबद्दल त्यांनी प्रशिक्षण केंद्र आणि आदर्श पदवी महाविद्यालयाचे कौतुक केले.
यावेळी विद्यापीठाचे प्र-कुलगुरु डॉ.श्रीराम कावळे, डॉ.मनीष उत्तरवार, मानव विज्ञानचे अधिष्ठाता तथा रा.से.यो.चे संचालक डॉ.श्याम खंडारे, आदर्श पदवी महाविद्यालयाचे प्राचार्य डॉ.कृष्णा कारू, पदव्युत्तर विभागातील डॉ.प्रशांत ठाकरे, डॉ.प्रितेश जाधव तसेच महाविद्यालयातील सहायक प्राध्यापक आणि विद्यार्थी उपस्थित होते.
